Act 19 | KYG | STEP | Apolosi'a Kolitiyani taonifi'mo mai'nigeno'ae'mo Polo'a folagapi'mo hane'niya avele'mo nata neno Efasasi taonifi'mo ava'yi huteno Goti ge'amo ne'afiya vaya'mo mai'nageno apaketeno'ae'mo,

Acts 19

Polo'a Efasasi taonifi'mo uno mai'niya gemae

1 Apolosi'a Kolitiyani taonifi'mo mai'nigeno'ae'mo Polo'a folagapi'mo hane'niya avele'mo nata neno Efasasi taonifi'mo ava'yi huteno Goti ge'amo ne'afiya vaya'mo mai'nageno apaketeno'ae'mo, 2 Lapakesa afitapa fatago hu'naya afina'mo Goti Auneme'amo aote Auneme'amo ago ali'nafiye, huno apafi ge'nige'apae'mo, Ha'ao, hu'a, Goti Auneme'amo mai'niye, huta o'afi'none, hu'a ha pai'nae. 3 Ha pai'nageno'ae'mo, Na agufa gelefe'mo ani'mo fale'nae, huno apafi ge'nige'apae'mo, Yoni'a alino apaya male'niya ge'ageke'mo afiteta ani gelefeke'mo ani'mo fale'none, hu'a ha pai'nae. 4 Polo'a, Yoni'a ani'mo faleno ne'apateno'ae'mo, Lapaipamo alitapa afe letetapa nagae nakamelegati'mo esiya vekamo Yesu Kalaisife'mo lapakesa afitapa fatago hiyo, huno hapa pai'niye, huno hapa pai'niye. 5 Ani gemo afi'nageno'ae'mo Ala kava ne'mo Yesu agi'aleti'mo ani'mo faleno apate'niye. 6 Polo'a apakufale'mo ayatala'mo male'nigeno'ae'mo Goti Auneme'amo aote Auneme'amo'mo apakaete'mo emineno ali'ya'mo ali'nige'apae'mo alu apake alu apakemo ne'ai'a Goti ge'amo ae'a hakalo hu'a hapa pai'nae. 7 Muki ani vaya'amo tuolofu'a vaya'mo mai'nae. 8 Polo'a lole'e mago'e kaimo mai'neno Yu vaya'ai mono nopi'mo haino lokiya gemo huno apakesamo alino hapa paisiyafe'mo alu ge alu geleti'mo Goti'a ne'yagaiya kavafe'mo ava gemo hapa pai'niye. 9 Mago vaya'amogimo lokiya apaipamo hane'niya'mofe'mo apakesa afi'a fatago osu'ne'a muki vaya'ai apaulagale'mo Ala kava ne'mo kavafe'mo hu'a faipa hu'a ate'nageno'ae'mo Polo'a apataleno uno Goti ge'amo ne'afiya vaya'age'mo apavalelino uno Tilanasi'a sukulumo alino apaya ne'maleya nopi'mo muki afina'ae afina'ae'mo alu ge alu geleti'mo apakesa alino hapa pai'niye. 10 Agaemo lole kafugamo mai'neno ani kava'mo hume hume ne'vige'apae'mo muki Esiya kotega vayapati'mo Yu vaya'e alu nofi vaya'mogi'e'mo Ala kava ne'mo ge'amo afi'nae.

Siva mafa'ne anaga'aife'mo apava gemo hu'niya gemae

11 Goti'a Polo'mo ayamufa huno ate'nigeno no'agaya aeto agufa aune kava'mo hu'niye. 12 Apakaemo Polo'a male'niya akasipi'e lavolavo'e'mo alini u'a kaita hapau'niya vaya'ai apakufale'mo male'nageno kaita'apimo hano huge hosu apaune vaya'mo alino hapafaino apatalege nehuno alino alagepa huno apate'niye. 13 Mago Yu vaya'mo nata ne'u'a mai'ne'a hosu apaune vaya'mo ali'a hapafai'a ne'apatalaya vaya'mogimo Ala kava ne'mo Yesu agi'aleti'mo amalageka hu'a hosu apaune vaya'mo ali'a hapafai'a apatalesayafe'mo hu'apae'mo, ani Polo'a aeno hakalo huno hapa nepaiya vekamo Yesu agi'aleti'mo emitetapa viyo, hu'a ge hu'nae. 14 Mago vekamo agi'amo Siva'a mono hu'a ne'apataya vaya'aite'mo yagaino ne'apateya vekamo mafa'ne'amo seveni'a mafa'ne anaga'mogimo ani kava'mo hu'nae. 15 Ani gemo hu'nageno'ae'mo hosu aune vekamo'a, Yesu'e Polo'e'mo anake'novana lapakaemo ina lagitapae, huno hapa pai'niye. 16 Hosu aune vekamo aipafi'mo mai'niya vekamo'a lusi kava huno apamagino apakufamo aino atalagauteno kukena'apimo alino aeno apake aino alino asagino ataleteno aeno apakase'nige'apae'mo no'afati'mo apakufa'alaga'age'mo atale'a apaune hetale'a u'nae. 17 Muki vaya'mo Efasasi taonifi'mo mai'naya Yu vayanagi alu nofi vayanagi hu'a ani kavafe'mo ava gemo afite'apae'mo lusi kava hu'a koli hute'a Ala kava ne'mo Yesu agi'ale'mo ali'a asaga hu'a ate'nae. 18 Asole vaya'mo apakesa afi'a fatago hu'naya'mofe'mo e'a muki vaya'ai apaulagale'mo hosu kava'mo hu'naya kava'apie'mo ae'a hakalo hu'a hapa pai'nae. 19 Ani vaya'mogimo analisa hege lusa kava huge nehaya muku'apimo asole vaya'ai apaulagale'mo alini'e'a atafi'mo kae'nae. Muki ani kae'naya mukumo miya fai'naya monimo lusi moni fifiti tauseni agufa monimo hane'niye. 20 Ani kava'mo hu'nageno Ala kava ne'mo ava gemo mago'e huno aino atagu faeno uneno hu'niye.

Efasasi vaya'mogimo Polofe'mo apano ae'naya gemae

21 Henaga'amo Goti Auneme'amo'mo Polo'mo agesa afi ya'mo alino ami'nigeno'ae'mo, Masetoniya kotega'e Akaiya kotega'e'mo ae'na agase'na u'na Yulusalemu taonifi'mo ava'yi huguve. Maige'nae'mo atale'na Lomu taonifi'mo u'na agegauve, huno agesa afi'niye. 22 Agaemo Timoti'e Ilasatasi'e'mo ha ne'ma'a vekala'mo alino anate'nige'ana Masetoniya kotegamo uta'ageno Esiya kotegamo mai'niye.

23 Ani afina'mo Efasasi taonifi vaya'mogimo Ala kava ne'mo kavafe'mo lusi kava hu'a apano ae'nae. 24 Mago vekamo agi'amo Nimitiliyasi'a lusi monileti'mo miya nefaiya siluva yafateti'mo mago aise no'mo alo nehiya vekamo mai'niye. Ani alo hu'niya goti'apimo agi'amo Atemisi mono nokana no'mo alo hu'nige'a ani ali'ya'mo ne'aliya vaya'mogimo lusi monimo alige alige hu'a mai'nae. 25 Agaemo mago'e huno ani agufa ali'ya'mo ne'aliya vaya'aife'mo ge hu'nige'a e'nageno'ae'mo, Vaya'nimogitapae, huno, Ago age'nayana lagae ali'yateti'mo lusi monimo ne'alune. 26 Lapakaemo Polo'a nehiya kava'mo agetetapa agae kavafe'mo ava gemo ago afi'nae. Agaemo mani Efasasi taonifi'mo mai'naya vaya'age'mo alino aino atagineno no'apatefa muki Esiya kotega mai'naya vaya'e'mo alino aino atagineno apateteno'ae'mo, Vaya'mogi apayateti'mo alo nehaya ya'mo goti'apimogi o'mai'nae, huno hapa paiteno apakesa mago'e huno alino hapa nepaiye. 27 Vaya'mogi henaga'amo lagaemo ne'aluna ali'yafe'mo, Hosu ali'ya'mo ne'aliye, hu'a hugae. Ali'yatie'mo hu'a faipa hu'a atege hogote gotitimo'ae huta nehuna a'mo mono nofe'mo hu'a faipa hu'a atege nehu'a agi'ale'mo ali'a afepi ategae. Esiya vaya'e muki ma mopafi vaya'mogi'e'mo gotitimo'ae huta nehuna afe'mo mono nehae, huno hapa pai'niye. 28 Ani gemo afite'apae'mo lusi kava huno apaipamo le'nige'apae'mo alopa gefati'mo hu'apae'mo, Atemisi'a Efasasi vaya'mogita alatimo mai'niye, hu'a huge huge hu'a mai'nae. 29 Huge nehage'apae'mo muki taonifi'mo mai'naya vaya'mogi apano ae'a apavamusa gemo hu'nige'a e'a Gaiyasi'e Alitakasi'e'mo Masetoniya vekala'mo Polo'e'mo umenitata neha'a vekala'mo anatafau'ana apayamukiki hu'a anavaleli'a ali'a anupa hu'a ne'maiya yategamo u'nae. 30 Polo'a uno apaulagale'mo he tino mai'neno hapa paigefe'mo nehige'apae'mo ge'amo ne'afiya vaya'mogi hu'a atafau'a ate'nae. 31 Mago Polo ao vaya'mogi ani kote'mo yagai'a ne'apataya vaya'mogimo, ali'a anupa hu'a ne'maiya yategamo o'uvo, hu'a hu'naya gemo hu'a atalageno Polotegamo u'niye. 32 Muki vaya'mogimo apano aete'a alopa gefati'mo alu ge alu gemo hu'nae. Asole vaya'mogimo, na kava higetae'mo ne'opi hu'a apakesa o'afi'nae. 33 Yu vaya'mogi Alekesanimo ayate he'a vayu huli'u'a ate'nageno muki vaya'ai apaulagale'mo he tino mai'niye. Mai'neno aya'mo ataleteno hosu kava'mo osu'none, huno hapa paigefe'mo hu'nige'a 34 agete'apae'mo Yu vekamo mai'niye, hu'a hute'a magokepi alopa gefati'mo hu'a ae'a lago hu'apae'mo, Atemisi'a Efasasi vaya'mogita alatimo mai'niye, hu'a yatala afina'mo huge huge hu'a mai'nae.

35 Mago vekamo Efasasi taonifi'mo mai'neno avo'mo nekaeya vekamo he ti'nige'apae'mo agete'a ge osu'a mai'nageno'ae'mo, Efasasi vayane, huno, Muki vaya'mogi afi'nayana Efasasi taonifi'mo ala Atemisi mono no'e koku'napati'mo asagauno ai'niya yafa'e'mo hane'nigeta ne'yagaune. 36 Magoke vekamo'a ani kavafe'mo ha'ao, huno huteno hega o'aegaiya'mofe'mo mago kava'mo malage huta osutapa afa'a maita falu hutapa maiyo. 37 Ani lole vekala'moganimo mono nopati'mo kumaya o'ali'ana gotitapimofe'mo hu'ana faipa hu'ana o'ate'na'a'monanafa manile'mo anavalelitapa e'nae. 38 Nimitiliyasi'e agae'e'mo ne'aliya agufa ali'ya'mo ne'aliya vaya'e'mo agoti hu'a anategefe hisayana agotimo hisaya afina'mo hane'niyanage'a agoti gemo ne'afiya vaya'mogimo afigae. Agoti afina'mo afa'a ali'a api ai'a ategae. 39 Lapakaetegamo mago'e gemo hane'nisiyana alitapa anupa huta maisaya afina'mo hisage'a ali'a alagepa hu'a ategae. 40 Lano ae'nona'mofe'mo mago hosu ya'mo afa'a aligune. Lapano ae'naya kava'mo aepa'amo ohane'niyanage'a loka hu'a lafi gesagetae'mo getimo afa'a ohanegaiye. Afa'a ataletapa viyo, huno hapa pai'niye.